Madaxweynaha Soomaaliya oo u hambalyeeyay ciidanka maamulka Puntland

Madaxweynaha Soomaaliya ahna Taliyaha Guud ee Ciidammada Qalabka sida Xasan Sheekh Maxamuud ayaa hambalyo u diray ciidanka dowlad goboleedka Puntland guulihii ay ka soo hoyeen dagaalkii ay la galeen Al-Shabaab oo doonayay inay degaannada Puntland isku fidiyaan.

Madaxweynaha Soomaaliya oo u hambalyeeyay ciidanka maamulka Puntland

“Anigoo ku hadlaya magaca Jamhuuriyadda Federaalka iyo kan Ciidammada Qalabka Sida, waxaan si diiran u soo dhoweynayaa uguna hambalyeynayaa geesiyaasha ciidanka Puntland guusha taariikhiga ah ee ay gaareen ee ay ku burburiyeen argagixisada Al Shabaab oo caadeystey falalka diinta iyo aadminimadaba ka baxsan’’.

Madaxweynaha ayaa sidoo kale sheegay in dhirbaaxada kulul ee loo gaystey Al Shabaab ay dhiirigelin u tahay dhammaan ummadda Soomaaliyeed ee dagaalka kula jirta argagixisada, daliilna ay u tahay in cadowga ugu dambeyntii laga sifeyn doono qeybahaa yare e ay weli ku harsan yihiin.

‘’Dowladda Federaalka ee Soomaaliya iyo maamullada dalka ka jira waxay ka mideysan yihiin dagaalka lagula jiro kooxaha argagixisada, waana waajib ina wada saaran inaan taageero buuxda u fidino degaan walba oo dalka ka mid ah oo khatar kala soo gudboonaada argagixisada. Al Shabaab waa naf la caari, markii culeyska gobollada kale ka haysta uu kordhey ayay isku dayeen inay goobo kale oo dagaal ka furan Puntland, taasina waxay noqotey riyo ay beeniyeen ciidanka maamulka Puntland’’, ayuu yiri Madaxweynaha.

Madaxweyne Xasan Sheekh Maxamuud ayaa ugu dambeyntii sheegay in dowladda ay muhimadda koowaad siineyso dib u dhiska iyo isku dhafka Ciidammada Xoogga Dalka Soomaaliyeed, si ay u hantaan amniga guud ee qaranka.

Section  Somali
Category   Local News
Tags  Madaxweynaha Soomaaliya

Comments

comments powered by Disqus
Valid XHTML 1.0 Valid CSS